Kalabhairava Ashtakam in Telugu – with transliteration

దేవరాజసేవ్యమానపావనాంఘ్రిపంకజం వ్యాలయజ్ఞసూత్రమిందుశేఖరం కృపాకరమ్ ।
నారదాదియోగివృందవందితం దిగంబరం కాశికాపురాధినాథకాలభైరవం భజే ॥ 1 ॥

devarājasevyamānapāvanāṅghripaṅkajaṃ vyālayajñasūtraminduśekharaṃ kṛpākaram |
nāradādiyogivṛndavanditaṃ digambaraṃ kāśikāpurādhināthakālabhairavaṃ bhaje || 1 ||

భానుకోటిభాస్వరం భవాబ్ధితారకం పరం నీలకంఠమీప్సితార్థదాయకం త్రిలోచనమ్ ।
కాలకాలమంబుజాక్షమక్షశూలమక్షరం కాశికాపురాధినాథకాలభైరవం భజే ॥ 2 ॥

bhānukoṭibhāsvaraṃ bhavābdhitārakaṃ paraṃ nīlakaṇṭhamīpsitārthadāyakaṃ trilocanam |
kālakālamambujākṣamakṣaśūlamakṣaraṃ kāśikāpurādhināthakālabhairavaṃ bhaje || 2 ||

శూలటంకపాశదండపాణిమాదికారణం శ్యామకాయమాదిదేవమక్షరం నిరామయమ్ ।
భీమవిక్రమం ప్రభుం విచిత్రతాండవప్రియం కాశికాపురాధినాథకాలభైరవం భజే ॥ 3 ॥

śūlaṭaṅkapāśadaṇḍapāṇimādikāraṇaṃ śyāmakāyamādidevamakṣaraṃ nirāmayam |
bhīmavikramaṃ prabhuṃ vicitratāṇḍavapriyaṃ kāśikāpurādhināthakālabhairavaṃ bhaje || 3 ||

భుక్తిముక్తిదాయకం ప్రశస్తచారువిగ్రహం భక్తవత్సలం స్థిరం సమస్తలోకవిగ్రహమ్ ।
వినిక్వణన్మనోజ్ఞహేమకింకిణీలసత్కటిం కాశికాపురాధినాథకాలభైరవం భజే ॥ 4 ॥

bhuktimuktidāyakaṃ praśastacāruvigrahaṃ bhaktavatsalaṃ sthiraṃ samastalokavigraham |
vinikvaṇanmanojñahemakiṅkiṇīlasatkaṭiṃ kāśikāpurādhināthakālabhairavaṃ bhaje || 4 ||

ధర్మసేతుపాలకం త్వధర్మమార్గనాశకం కర్మపాశమోచకం సుశర్మదాయకం విభుమ్ ।
స్వర్ణవర్ణకేశపాశశోభితాంగనిర్మలం కాశికాపురాధినాథకాలభైరవం భజే ॥ 5 ॥

dharmasetupālakaṃ tvadharmamārganāśakaṃ karmapāśamocakaṃ suśarmadāyakaṃ vibhum |
svarṇavarṇakeśapāśaśobhitāṅganirmalaṃ kāśikāpurādhināthakālabhairavaṃ bhaje || 5 ||

రత్నపాదుకాప్రభాభిరామపాదయుగ్మకం నిత్యమద్వితీయమిష్టదైవతం నిరంజనమ్ ।
మృత్యుదర్పనాశనం కరాలదంష్ట్రమోక్షణం కాశికాపురాధినాథకాలభైరవం భజే ॥ 6 ॥

ratnapādukāprabhābhirāmapādayugmakaṃ nityamadvitīyamiṣṭadaivataṃ nirañjanam |
mṛtyudarpanāśanaṃ karāladaṃṣṭramokṣaṇaṃ kāśikāpurādhināthakālabhairavaṃ bhaje || 6 ||

అట్టహాసభిన్నపద్మజాండకోశసంతతిం దృష్టిపాతనష్టపాపజాలముగ్రశాసనమ్ ।
అష్టసిద్ధిదాయకం కపాలమాలికాధరం కాశికాపురాధినాథకాలభైరవం భజే ॥ 7 ॥

aṭṭahāsabhinnapadmajāṇḍakośasantatiṃ dṛṣṭipātanaṣṭapāpajālamugraśāsanam |
aṣṭasiddhidāyakaṃ kapālamālikādharaṃ kāśikāpurādhināthakālabhairavaṃ bhaje || 7 ||

భూతసంఘనాయకం విశాలకీర్తిదాయకం కాశివాసిలోకపుణ్యపాపశోధకం విభుమ్ ।
నీతిమార్గకోవిదం పురాతనం జగత్పతిం కాశికాపురాధినాథకాలభైరవం భజే ॥ 8 ॥

bhūtasaṅghanāyakaṃ viśālakīrtidāyakaṃ kāśivāsilokapuṇyapāpaśodhakaṃ vibhum |
nītimārgakovidaṃ purātanaṃ jagatpatiṃ kāśikāpurādhināthakālabhairavaṃ bhaje || 8 ||

కాలభైరవాష్టకం పఠంతి యే మనోహరం జ్ఞానముక్తిసాధకం విచిత్రపుణ్యవర్ధనమ్ ।
శోకమోహదైన్యలోభకోపతాపనాశనం తే ప్రయాంతి కాలభైరవాంఘ్రిసన్నిధిం ధ్రువమ్ ॥ 9 ॥

kālabhairavāṣṭakaṃ paṭhanti ye manoharaṃ jñānamuktisādhakaṃ vicitrapuṇyavardhanam |
śokamohadainyalobhakopatāpanāśanaṃ te prayānti kālabhairavāṅghrisannidhiṃ dhruvam || 9 ||