Sri Venkateswara Suprabhatam in Telugu – with transliteration

కౌసల్యా సుప్రజా రామ పూర్వా సంధ్యా ప్రవర్తతే ।
ఉత్తిష్ఠ నరశార్దూల కర్తవ్యం దైవమాహ్నికమ్ ॥ 1 ॥

kausalyā suprajā rāma pūrvā sandhyā pravartate |
uttiṣṭha naraśārdūla kartavyaṃ daivamāhnikam || 1 ||

ఉత్తిష్ఠోత్తిష్ఠ గోవింద ఉత్తిష్ఠ గరుడధ్వజ ।
ఉత్తిష్ఠ కమలాకాంత త్రైలోక్యం మంగలం కురు ॥ 2 ॥

uttiṣṭhottiṣṭha govinda uttiṣṭha garuḍadhvaja |
uttiṣṭha kamalākānta trailokyaṃ maṅgalaṃ kuru || 2 ||

మాతస్సమస్తజగతాం మధుకైటభారేః
వక్షోవిహారిణి మనోహరదివ్యమూర్తే ।
శ్రీస్వామిని శ్రితజనప్రియదానశీలే
శ్రీవేంకటేశదయితే తవ సుప్రభాతమ్ ॥ 3 ॥

mātassamastajagatāṃ madhukaiṭabhāreḥ
vakṣovihāriṇi manoharadivyamūrte |
śrīsvāmini śritajanapriyadānaśīle
śrīveṅkaṭeśadayite tava suprabhātam || 3 ||

తవ సుప్రభాతమరవిందలోచనే భవతు ప్రసన్నముఖచంద్రమండలే ।
విధిశంకరేంద్రవనితాభిరర్చితే వృషశైలనాథదయితే దయానిధే ॥ 4 ॥

tava suprabhātamaravindalocane bhavatu prasannamukhacandramaṇḍale |
vidhiśaṅkarendravanitābhirarcite vṛṣaśailanāthadayite dayānidhe || 4 ||

అత్ర్యాదిసప్తఋషయస్సముపాస్య సంధ్యా
మాకాశసింధుకమలాని మనోహరాణి ।
ఆదాయ పాదయుగమర్చయితుం ప్రపన్నాః
శేషాద్రిశేఖరవిభో తవ సుప్రభాతమ్ ॥ 5 ॥

atryādisaptaṛṣayassamupāsya sandhyā
mākāśasindhukamalāni manoharāṇi |
ādāya pādayugamarcayituṃ prapannāḥ
śeṣādriśekharavibho tava suprabhātam || 5 ||

పంచాననాబ్జభవషణ్ముఖవాసవాద్యాః
త్రైవిక్రమాదిచరితం విబుధాః స్తువంతి ।
భాషాపతిః పఠతి వాసరశుద్ధిమారాత్
శేషాద్రిశేఖరవిభో తవ సుప్రభాతమ్ ॥ 6 ॥

pañcānanābjabhavaṣaṇmukhavāsavādyāḥ
traivikramādicaritaṃ vibudhāḥ stuvanti |
bhāṣāpatiḥ paṭhati vāsaraśuddhimārāt
śeṣādriśekharavibho tava suprabhātam || 6 ||

ఈషత్ప్రఫుల్లసరసీరుహనారికేల
పూగద్రుమాదిసుమనోహరపాలికానామ్ ।
ఆవాతి మందమనిలః సహ దివ్యగంధైః
శేషాద్రిశేఖరవిభో తవ సుప్రభాతమ్ ॥ 7 ॥

īṣatpraphullasarasīruhanārikela
pūgadrumādisumanoharapālikānām |
āvāti mandamanilaḥ saha divyagandhaiḥ
śeṣādriśekharavibho tava suprabhātam || 7 ||

ఉన్మీల్య నేత్రయుగముత్తమపంజరస్థాః
పాత్రావశిష్టకదలీఫలపాయసాని ।
భుక్త్వా సలీలమథ కేలిశుకాః పఠంతి
శేషాద్రిశేఖరవిభో తవ సుప్రభాతమ్ ॥ 8 ॥

unmīlya netrayugamuttamapañjarasthāḥ
pātrāvaśiṣṭakadalīphalapāyasāni |
bhuktvā salīlamatha keliśukāḥ paṭhanti
śeṣādriśekharavibho tava suprabhātam || 8 ||

తంత్రీప్రకర్షమధురస్వనయా విపంచ్యా
గాయత్యనంతచరితం తవ నారదోఽపి ।
భాషాసమగ్రమసకృత్కరచారురమ్యం
శేషాద్రిశేఖరవిభో తవ సుప్రభాతమ్ ॥ 9 ॥

tantrīprakarṣamadhurasvanayā vipañcyā
gāyatyanantacaritaṃ tava nārado'pi |
bhāṣāsamagramasakṛtkaracāruramyaṃ
śeṣādriśekharavibho tava suprabhātam || 9 ||

భృంగావలీ చ మకరందరసానువిద్ధ
ఝంకారగీతనినదైః సహ సేవనాయ ।
నిర్యాత్యుపాంతసరసీకమలోదరేభ్యః
శేషాద్రిశేఖరవిభో తవ సుప్రభాతమ్ ॥ 10 ॥

bhṛṅgāvalī ca makarandarasānuviddha
jhaṅkāragītaninadaiḥ saha sevanāya |
niryātyupāntasarasīkamalodarebhyaḥ
śeṣādriśekharavibho tava suprabhātam || 10 ||

యోషాగణేన వరదధ్నివిమథ్యమానే
ఘోషాలయేషు దధిమంథనతీవ్రఘోషాః ।
రోషాత్కలిం విదధతే కకుభశ్చ కుంభాః
శేషాద్రిశేఖరవిభో తవ సుప్రభాతమ్ ॥ 11 ॥

yoṣāgaṇena varadadhnivimathyamāne
ghoṣālayeṣu dadhimanthanatīvraghoṣāḥ |
roṣātkaliṃ vidadhate kakubhaśca kumbhāḥ
śeṣādriśekharavibho tava suprabhātam || 11 ||

పద్మేశమిత్రశతపత్రగతాలివర్గాః
హర్తుం శ్రియం కువలయస్య నిజాంగలక్ష్మ్యా ।
భేరీనినాదమివ బిభ్రతి తీవ్రనాదం
శేషాద్రిశేఖరవిభో తవ సుప్రభాతమ్ ॥ 12 ॥

padmeśamitraśatapatragatālivargāḥ
hartuṃ śriyaṃ kuvalayasya nijāṅgalakṣmyā |
bherīninādamiva bibhrati tīvranādaṃ
śeṣādriśekharavibho tava suprabhātam || 12 ||

శ్రీమన్నభీష్టవరదాఖిలలోకబంధో
శ్రీశ్రీనివాసజగదేకదయైకసింధో ।
శ్రీదేవతాగృహభుజాంతరదివ్యమూర్తే
శ్రీవేంకటాచలపతే తవ సుప్రభాతమ్ ॥ 13 ॥

śrīmannabhīṣṭavaradākhilalokabandho
śrīśrīnivāsajagadekadayaikasindho |
śrīdevatāgṛhabhujāntaradivyamūrte
śrīveṅkaṭācalapate tava suprabhātam || 13 ||

శ్రీస్వామిపుష్కరిణికాప్లవనిర్మలాంగాః
శ్రేయోఽర్థినో హరవిరించిసనందనాద్యాః ।
ద్వారే వసంతి వరవేత్రహతోత్తమాంగాః
శ్రీవేంకటాచలపతే తవ సుప్రభాతమ్ ॥ 14 ॥

śrīsvāmipuṣkariṇikāplavanirmalāṅgāḥ
śreyo'rthino haraviriñcisanandanādyāḥ |
dvāre vasanti varavetrahatottamāṅgāḥ
śrīveṅkaṭācalapate tava suprabhātam || 14 ||

శ్రీశేషశైలగరుడాచలవేంకటాద్రి
నారాయణాద్రివృషభాద్రివృషాద్రిముఖ్యామ్ ।
ఆఖ్యాం త్వదీయ వసతేరనిశం వదంతి
శ్రీవేంకటాచలపతే తవ సుప్రభాతమ్ ॥ 15 ॥

śrīśeṣaśailagaruḍācalaveṅkaṭādri
nārāyaṇādrivṛṣabhādrivṛṣādrimukhyām |
ākhyāṃ tvadīya vasateraniśaṃ vadanti
śrīveṅkaṭācalapate tava suprabhātam || 15 ||

సేవాపరాః శివసురేశకృశానుధర్మ
రక్షోంబునాథపవమానధనాధినాథాః ।
బద్ధాంజలిప్రవిలసన్నిజశీర్షదేశాః
శ్రీవేంకటాచలపతే తవ సుప్రభాతమ్ ॥ 16 ॥

sevāparāḥ śivasureśakṛśānudharma
rakṣombunāthapavamānadhanādhināthāḥ |
baddhāñjalipravilasannijaśīrṣadeśāḥ
śrīveṅkaṭācalapate tava suprabhātam || 16 ||

ధాటీషు తే విహగరాజమృగాధిరాజ
నాగాధిరాజగజరాజహయాధిరాజాః ।
స్వస్వాధికారమహిమాధికమర్థయంతే
శ్రీవేంకటాచలపతే తవ సుప్రభాతమ్ ॥ 17 ॥

dhāṭīṣu te vihagarājamṛgādhirāja
nāgādhirājagajarājahayādhirājāḥ |
svasvādhikāramahimādhikamarthayante
śrīveṅkaṭācalapate tava suprabhātam || 17 ||

సూర్యేందుభౌమబుధవాక్పతికావ్యసౌరి
స్వర్భానుకేతుదివిషత్పరిషత్ప్రధానాః ।
త్వద్దాసదాసచరమావధిదాసదాసాః
శ్రీవేంకటాచలపతే తవ సుప్రభాతమ్ ॥ 18 ॥

sūryendubhaumabudhavākpatikāvyasauri
svarbhānuketudiviṣatpariṣatpradhānāḥ |
tvaddāsadāsacaramāvadhidāsadāsāḥ
śrīveṅkaṭācalapate tava suprabhātam || 18 ||

త్వత్పాదధూలిభరితస్ఫురితోత్తమాంగాః
స్వర్గాపవర్గనిరపేక్షనిజాంతరంగాః ।
కల్పాగమాకలనయాకులతాం లభంతే
శ్రీవేంకటాచలపతే తవ సుప్రభాతమ్ ॥ 19 ॥

tvatpādadhūlibharitasphuritottamāṅgāḥ
svargāpavarganirapekṣanijāntaraṅgāḥ |
kalpāgamākalanayākulatāṃ labhante
śrīveṅkaṭācalapate tava suprabhātam || 19 ||

త్వద్గోపురాగ్రశిఖరాణి నిరీక్షమాణాః
స్వర్గాపవర్గపదవీం పరమాం శ్రయంతః ।
మర్త్యా మనుష్యభువనే మతిమాశ్రయంతే
శ్రీవేంకటాచలపతే తవ సుప్రభాతమ్ ॥ 20 ॥

tvadgopurāgraśikharāṇi nirīkṣamāṇāḥ
svargāpavargapadavīṃ paramāṃ śrayantaḥ |
martyā manuṣyabhuvane matimāśrayante
śrīveṅkaṭācalapate tava suprabhātam || 20 ||

శ్రీభూమినాయక దయాదిగుణామృతాబ్ధే
దేవాధిదేవ జగదేకశరణ్యమూర్తే ।
శ్రీమన్ననంత గరుడాదిభిరర్చితాంఘ్రే
శ్రీవేంకటాచలపతే తవ సుప్రభాతమ్ ॥ 21 ॥

śrībhūmināyaka dayādiguṇāmṛtābdhe
devādhideva jagadekaśaraṇyamūrte |
śrīmannananta garuḍādibhirarcitāṇghre
śrīveṅkaṭācalapate tava suprabhātam || 21 ||

శ్రీపద్మనాభ పురుషోత్తమ వాసుదేవ
వైకుంఠ మాధవ జనార్దన చక్రపాణే ।
శ్రీవత్సచిన్హ శరణాగతపారిజాత
శ్రీవేంకటాచలపతే తవ సుప్రభాతమ్ ॥ 22 ॥

śrīpadmanābha puruṣottama vāsudeva
vaikuṇṭha mādhava janārdana cakrapāṇe |
śrīvatsacinha śaraṇāgatapārijāta
śrīveṇkaṭācalapate tava suprabhātam || 22 ||

కందర్పదర్ప హరసుందర దివ్యమూర్తే
కాంతాకుచాంబురుహ కుట్మల లోలదృష్టే ।
కల్యాణనిర్మలగుణాకర దివ్యకీర్తే
శ్రీవేంకటాచలపతే తవ సుప్రభాతమ్ ॥ 23 ॥

kandarpadarpa harasundara divyamūrte
kāntākucāmburuha kuṭmala loladṛṣṭe |
kalyāṇanirmalaguṇākara divyakīrte
śrīveṇkaṭācalapate tava suprabhātam || 23 ||

మీనాకృతే కమఠ కోల నృసింహ వర్ణిన్
స్వామిన్ పరశ్వథతపోధన రామచంద్ర ।
శేషాంశరామ యదునందన కల్కిరూప
శ్రీవేంకటాచలపతే తవ సుప్రభాతమ్ ॥ 24 ॥

mīnākṛte kamaṭha kola nṛsiṃha varṇin
svāmin paraśvathatapodhana rāmacandra |
śeṣāṃśarāma yadunandana kalkirūpa
śrīveṇkaṭācalapate tava suprabhātam || 24 ||

ఏలా లవంగ ఘనసార సుగంధి తీర్థం
దివ్యం వియత్సరితి హేమఘటేషు పూర్ణమ్ ।
ధృత్వాఽఽద్య వైదిక శిఖామణయః ప్రహృష్టాః
తిష్ఠంతి వేంకటపతే తవ సుప్రభాతమ్ ॥ 25 ॥

elā lavaṇga ghanasāra sugandhi tīrthaṃ
divyaṃ viyatsariti hemaghaṭeṣu pūrṇam |
dhṛtvā''dya vaidika śikhāmaṇayaḥ prahṛṣṭāḥ
tiṣṭhanti veṇkaṭapate tava suprabhātam || 25 ||

భాస్వానుదేతి వికచాని సరోరుహాణి
సంపూరయంతి నినదైః కకుభో విహంగాః ।
శ్రీవైష్ణవాస్సతతమర్థిత మంగలాస్తే
ధామాఽఽశ్రయంతి తవ వేంకట సుప్రభాతమ్ ॥ 26 ॥

bhāsvānudeti vikacāni saroruhāṇi
sampūrayanti ninadaiḥ kakubho vihaṇgāḥ |
śrīvaiṣṇavāssatatamarthita maṇgalāste
dhāmā''śrayanti tava veṇkaṭa suprabhātam || 26 ||

బ్రహ్మాదయః సురవరాస్సమహర్షయస్తే
సంతస్సనందన ముఖాస్త్వథ యోగివర్యాః ।
ధామాంతికే తవ హి మంగలవస్తు హస్తాః
శ్రీవేంకటాచలపతే తవ సుప్రభాతమ్ ॥ 27 ॥

brahmādayaḥ suravarāssamaharṣayaste
santassanandana mukhāstvatha yogivaryāḥ |
dhāmāntike tava hi maṇgalavastu hastāḥ
śrīveṇkaṭācalapate tava suprabhātam || 27 ||

లక్ష్మీనివాస నిరవద్యగుణైకసింధో
సంసార సాగర సముత్తరణైకసేతో ।
వేదాంతవేద్యనిజవైభవ భక్తభోగ్య
శ్రీవేంకటాచలపతే తవ సుప్రభాతమ్ ॥ 28 ॥

lakṣmīnivāsa niravadyaguṇaikasindho
saṃsāra sāgara samuttaraṇaikaseto |
vedāntavedyanijavaibhava bhaktabhogya
śrīveṅkaṭācalapate tava suprabhātam || 28 ||

ఇత్థం వృషాచలపతేరిహ సుప్రభాతం
యే మానవాః ప్రతిదినం పఠితుం ప్రవృత్తాః ।
తేషాం ప్రభాతసమయే స్మృతిరంగభాజాం
ప్రజ్ఞాం పరార్థసులభాం పరమాం ప్రసూతే ॥ 29 ॥

itthaṃ vṛṣācalapateriha suprabhātaṃ
ye mānavāḥ pratidinaṃ paṭhituṃ pravṛttāḥ |
teṣāṃ prabhātasamaye smṛtiraṅgabhājāṃ
prajñāṃ parārthasulabhāṃ paramāṃ prasūte || 29 ||