కనకధారా స్తోత్రం – తెలుగులో పూర్తి పాఠం

అంగం హరేః పులకభూషణమాశ్రయంతీ
భృంగాంగనేవ ముకులాభరణం తమాలమ్ ।
అంగీకృతాఖిలవిభూతిరపాంగలీలా
మాంగల్యదాఽస్తు మమ మంగలదేవతాయాః ॥ 1 ॥

aṅgaṃ hareḥ pulakabhūṣaṇamāśrayantī
bhṛṅgāṅganeva mukulābharaṇaṃ tamālam |
aṅgīkṛtākhilavibhūtirapāṅgalīlā
māṅgalyadā'stu mama maṅgaladevatāyāḥ || 1 ||

ముగ్ధా ముహుర్విదధతీ వదనే మురారేః
ప్రేమత్రపాప్రణిహితాని గతాగతాని ।
మాలా దృశోర్మధుకరీవ మహోత్పలే యా
సా మే శ్రియం దిశతు సాగరసంభవాయాః ॥ 2 ॥

mugdhā muhurvidadhatī vadane murāreḥ
prematrapāpraṇihitāni gatāgatāni |
mālā dṛśormadhukarīva mahotpale yā
sā me śriyaṃ diśatu sāgarasambhavāyāḥ || 2 ||

విశ్వామరేంద్రపదవిభ్రమదానదక్షమ్
ఆనందహేతురధికం మురవిద్విషోఽపి ।
ఈషన్నిషీదతు మయి క్షణమీక్షణార్ధమ్
ఇందీవరోదరసహోదరమిందిరాయాః ॥ 3 ॥

viśvāmarendrapadavibhramadānadakṣam
ānandaheturadhikaṃ muravidviṣo'pi |
īṣanniṣīdatu mayi kṣaṇamīkṣaṇārdham
indīvarodarasahodaramindirāyāḥ || 3 ||

ఆమీలితాక్షమధిగమ్య ముదా ముకుందమ్
ఆనందకందమనిమేషమనంగతంత్రమ్ ।
ఆకేకరస్థితకనీనికపక్ష్మనేత్రం
భూత్యై భవేన్మమ భుజంగశయాంగనాయాః ॥ 4 ॥

āmīlitākṣamadhigamya mudā mukundam
ānandakandamanimeṣamanaṅgatantram |
ākekarasthitakanīnikapakṣmanetraṃ
bhūtyai bhavenmama bhujaṅgaśayāṅganāyāḥ || 4 ||

బాహ్వంతరే మధుజితః శ్రితకౌస్తుభే యా
హారావలీవ హరినీలమయీ విభాతి ।
కామప్రదా భగవతోఽపి కటాక్షమాలా
కల్యాణమావహతు మే కమలాలయాయాః ॥ 5 ॥

bāhvantare madhujitaḥ śritakaustubhe yā
hārāvalīva harinīlamayī vibhāti |
kāmapradā bhagavato'pi kaṭākṣamālā
kalyāṇamāvahatu me kamalālayāyāḥ || 5 ||

కాలాంబుదాలిలలితోరసి కైటభారేః
ధారాధరే స్ఫురతి యా తడిదంగనేవ ।
మాతుః సమస్తజగతాం మహనీయమూర్తిర్
భద్రాణి మే దిశతు భార్గవనందనాయాః ॥ 6 ॥

kālāmbudālilalitorasi kaiṭabhāreḥ
dhārādhare sphurati yā taṛidaṅganeva |
mātuḥ samastajagatāṃ mahanīyamūrtir
bhadrāṇi me diśatu bhārgavanandanāyāḥ || 6 ||

ప్రాప్తం పదం ప్రథమతః ఖలు యత్ప్రభావాన్
మాంగల్యభాజి మధుమాథిని మన్మథేన ।
మయ్యాపతేత్తదిహ మంథరమీక్షణార్ధం
మందాలసం చ మకరాలయకన్యకాయాః ॥ 7 ॥

prāptaṃ padaṃ prathamataḥ khalu yatprabhāvān
māṅgalyabhāji madhumāthini manmathena |
mayyāpatettadiha mantharamīkṣaṇārdhaṃ
mandālasaṃ ca makarālayakanyakāyāḥ || 7 ||

దద్యాద్దయానుపవనో ద్రవిణాంబుధారామ్
అస్మిన్నకించనవిహంగశిశౌ విషణ్ణే ।
దుష్కర్మఘర్మమపనీయ చిరాయ దూరం
నారాయణప్రణయినీనయనాంబువాహః ॥ 8 ॥

dadyāddayānupavano draviṇāmbudhārām
asminnakiñcanavihaṅgaśiśau viṣaṇṇe |
duṣkarmagharmamapanīya cirāya dūraṃ
nārāyaṇapraṇayinīnayanāmbuvāhaḥ || 8 ||

ఇష్టావిశిష్టమతయోఽపి యయా దయార్ద్ర
దృష్ట్యా త్రివిష్టపపదం సులభం లభంతే ।
దృష్టిః ప్రహృష్టకమలోదరదీప్తిరిష్టాం
పుష్టిం కృషీష్ట మమ పుష్కరవిష్టరాయాః ॥ 9 ॥

iṣṭāviśiṣṭamatayo'pi yayā dayārdra
dṛṣṭyā triviṣṭapapadaṃ sulabhaṃ labhante |
dṛṣṭiḥ prahṛṣṭakamalodaradīptiriṣṭāṃ
puṣṭiṃ kṛṣīṣṭa mama puṣkaraviṣṭarāyāḥ || 9 ||

గీర్దేవతేతి గరుడధ్వజసుందరీతి
శాకంభరీతి శశిశేఖరవల్లభేతి ।
సృష్టిస్థితిప్రలయకేలిషు సంస్థితాయై
తస్యై నమస్త్రిభువనైకగురోస్తరుణ్యై ॥ 10 ॥

gīrdevateti garuṛadhvajasundarīti
śākambharīti śaśiśekharavallabheti |
sṛṣṭisthitipralayakeliṣu saṃsthitāyai
tasyai namastribhuvanaikagurostaruṇyai || 10 ||

శ్రుత్యై నమోఽస్తు శుభకర్మఫలప్రసూత్యై
రత్యై నమోఽస్తు రమణీయగుణార్ణవాయై ।
శక్త్యై నమోఽస్తు శతపత్రనికేతనాయై
పుష్ట్యై నమోఽస్తు పురుషోత్తమవల్లభాయై ॥ 11 ॥

śrutyai namo'stu śubhakarmaphalaprasūtyai
ratyai namo'stu ramaṇīyaguṇārṇavāyai |
śaktyai namo'stu śatapatraniketanāyai
puṣṭyai namo'stu puruṣottamavallabhāyai || 11 ||

నమోఽస్తు నాలీకనిభాననాయై
నమోఽస్తు దుగ్ధోదధిజన్మభూమ్యై ।
నమోఽస్తు సోమామృతసోదరాయై
నమోఽస్తు నారాయణవల్లభాయై ॥ 12 ॥

namo'stu nālīkanibhānanāyai
namo'stu dugdhodadhijanmabhūmyai |
namo'stu somāmṛtasodarāyai
namo'stu nārāyaṇavallabhāyai || 12 ||

నమోఽస్తు హేమాంబుజపీఠికాయై
నమోఽస్తు భూమండలనాయికాయై ।
నమోఽస్తు దేవాదిదయాపరాయై
నమోఽస్తు శార్ంగాయుధవల్లభాయై ॥ 13 ॥

namo'stu hemāmbujapīṭhikāyai
namo'stu bhūmaṇḍalanāyikāyai |
namo'stu devādidayāparāyai
namo'stu śārṅgāyudhavallabhāyai || 13 ||

నమోఽస్తు దేవ్యై భృగునందనాయై
నమోఽస్తు విష్ణోరురసి స్థితాయై ।
నమోఽస్తు లక్ష్మ్యై కమలాలయాయై
నమోఽస్తు దామోదరవల్లభాయై ॥ 14 ॥

namo'stu devyai bhṛgunandanāyai
namo'stu viṣṇorurasi sthitāyai |
namo'stu lakṣmyai kamalālayāyai
namo'stu dāmodaravallabhāyai || 14 ||

నమోఽస్తు కాంత్యై కమలేక్షణాయై
నమోఽస్తు భూత్యై భువనప్రసూత్యై ।
నమోఽస్తు దేవాదిభిరర్చితాయై
నమోఽస్తు నందాత్మజవల్లభాయై ॥ 15 ॥

namo'stu kāntyai kamalekṣaṇāyai
namo'stu bhūtyai bhuvanaprasūtyai |
namo'stu devādibhirarcitāyai
namo'stu nandātmajavallabhāyai || 15 ||

సంపత్కరాణి సకలేంద్రియనందనాని
సామ్రాజ్యదానవిభవాని సరోరుహాక్షి ।
త్వద్వందనాని దురితాహరణోద్యతాని
మామేవ మాతరనిశం కలయంతు మాన్యే ॥ 16 ॥

sampatkarāṇi sakalendriyanandanāni
sāmrājyadānavibhavāni saroruhākṣi |
tvadvandanāni duritāharaṇodyatāni
māmeva mātaraniśaṃ kalayantu mānye || 16 ||

యత్కటాక్షసముపాసనావిధిః
సేవకస్య సకలార్థసంపదః ।
సంతనోతి వచనాంగమానసైస్
త్వాం మురారిహృదయేశ్వరీం భజే ॥ 17 ॥

yatkaṭākṣasamupāsanāvidhiḥ
sevakasya sakalārthasampadaḥ |
santanoti vacanāṅgamānasais
tvāṃ murārihṛdayeśvarīṃ bhaje || 17 ||

సరసిజనిలయే సరోజహస్తే
ధవలతమాంశుకగంధమాల్యశోభే ।
భగవతి హరివల్లభే మనోజ్ఞే
త్రిభువనభూతికరి ప్రసీద మహ్యమ్ ॥ 18 ॥

sarasijanilaye sarojahaste
dhavalatamāṃśukagandhamālyaśobhe |
bhagavati harivallabhe manojñe
tribhuvanabhūtikari prasīda mahyam || 18 ||

దిగ్ఘస్తిభిః కనకకుంభముఖావసృష్ట
స్వర్వాహినీవిమలచారుజలప్లుతాంగీమ్ ।
ప్రాతర్నమామి జగతాం జననీమశేష
లోకాధినాథగృహిణీమమృతాబ్ధిపుత్రీమ్ ॥ 19 ॥

digghastibhiḥ kanakakumbhamukhāvasṛṣṭa
svarvāhinīvimalacārujalaplutāṅgīm |
prātarnamāmi jagatāṃ jananīmaśeṣa
lokādhināthagṛhiṇīmamṛtābdhiputrīm || 19 ||

కమలే కమలాక్షవల్లభే త్వం
కరుణాపూరతరంగితైరపాంగైః ।
అవలోకయ మామకించనానాం
ప్రథమం పాత్రమకృత్రిమం దయాయాః ॥ 20 ॥

kamale kamalākṣavallabhe tvaṃ
karuṇāpūrataraṅgitairapāṅgaiḥ |
avalokaya māmakiñcanānāṃ
prathamaṃ pātramakṛtrimaṃ dayāyāḥ || 20 ||

దేవి ప్రసీద జగదీశ్వరి లోకమాతః
కల్యాణగాత్రి కమలేక్షణజీవనాథే ।
దారిద్ర్యభీతిహృదయం శరణాగతం మామ్
ఆలోకయ ప్రతిదినం సదయైరపాంగైః ॥ 21 ॥

devi prasīda jagadīśvari lokamātaḥ
kalyāṇagātri kamalekṣaṇajīvanāthe |
dāridryabhītihṛdayaṃ śaraṇāgataṃ mām
ālokaya pratidinaṃ sadayairapāṅgaiḥ || 21 ||

స్తువంతి యే స్తుతిభిరమూభిరన్వహం
త్రయీమయీం త్రిభువనమాతరం రమామ్ ।
గుణాధికా గురుతరభాగ్యభాగినో
భవంతి తే భువి బుధభావితాశయాః ॥ 22 ॥

stuvanti ye stutibhiramūbhiranvahaṃ
trayīmayīṃ tribhuvanamātaraṃ ramām |
guṇādhikā gurutarabhāgyabhāgino
bhavanti te bhuvi budhabhāvitāśayāḥ || 22 ||